بسبب مشهد «الميكروباص».. إبراهيم سعيد يفتح النار على الزمالك

علق الإعلامي إبراهيم سعيد، على مقطع الفيديو المتداول لـ لاعبي الزمالك داخل «ميكروباص» بعد مباراة أبو قير للأسمدة في كأس مصر.

وظهر لاعبي الزمالك في ميكروباص بعد مباراتهم أمام أبوقير للأسمدة في دور الـ32 من بطولة كأس مصر ، والتي انتهت بفوز الفارس الأبيض 2-0.

وقال إبراهيم سعيد، في تصريح تليفزيوني عبر شاشة «النهار»: «للدرجادي وصل الحال بـ نادي الزمالك إنه مش قادر يوفر أتوبيس للعيبة تروح المباراة، الأزمة المالية وصلت بيهم لهذه الحالة».

وأضاف: «المنظر مكنش كويس خالص، والحاجات دي بتقل من نادي الزمالك، ومحدش بعد كدة يتكلم على راعي، أو يقول النادي الأهلي الناحية التسويقية أكبر من الزمالك».

وأكمل: «مين الراعي اللي هيجي لنادي الزمالك، وهو مركب لعيبته ميكروباص، لأن اساسًا الراعي بيحط إعلانته على الأتوبيس».

وأردف إبراهيم سعيد: «المتعارف والطبيعي إن لو في 2 لعيبه بيركبوا الأتوبيس، ده فرض على النادي، لأن معاهم الأدوات ولبس اللعيبة، ده الدرجة التانية والتالتة مفيش المنظر ده».

وزاد: «الحاجات دي بتدمر أي لعيب، وبتخلي شكلهم مش حلو، اللعيبة في الفيديو مش مبسوطة، ويمكن الوحيد اللي مبسوط ناصر منسي».

وأشار إلى أن مفيش حاجة اسمها لعيب يروح المباراة بشبشب، زي اللي لابسه ناصر منسي، فين مدير الكرة عبدالواحد السيد من الكلام ده.